ನಮ್ಮ ಸಂವಿಧಾನ

ಬಾಬಾಸಾಹೇಬರ ಪರಿಶ್ರಮದ ಸತ್ಪಲ ನಮ್ಮ ಸಂವಿಧಾನ
ಪೂರ್ವ ಪೀಠಿಕೆಯ ನುಡಿ ತೋರಣ ಸ್ವಾಭಿಮಾನ ದೇಶಾಭಿಮಾನದ ಹೊನ್ನ ಕಿರಣ

ವೈವಿಧ್ಯತೆಯ ಅಂಗಳದಲ್ಲಿ
ಬಿರಿದ ಐಕ್ಯತೆಯ ಸುಂದರ ಪುಷ್ಪ ನಮ್ಮ ಸಂವಿಧಾನ

ಜಾತ್ಯತೀತ ಮಂದಿರದಲ್ಲಿ
ಹಕ್ಕುಗಳ ದೀವಟಿಗೆ ಹಿಡಿದು
ಕರ್ತವ್ಯಗಳ ಜಗುಲಿಯ ಮೇಲೆ ಭಗವಂತನ ದಿಗ್ದರ್ಶನ ಮಾಡಿದ ಧೀಮಂತ ಚೇತನ                   ನಮ್ಮ ಸಂವಿಧಾನ


ಸುದೀರ್ಘ ದಿನಗಳ ಪರ್ಯಂತ ಬಾಬಾಸಾಹೇಬರ ಮಾನಸ ಗರ್ಭದಿಂದ ಆವಿರ್ಭವಿಸಿ
ಅನವರತ  ಪ್ರಜೆಗಳ  ಕಲ್ಯಾಣ ಬಯಸಿ

ಶಕ್ತಿ ಯುಕ್ತಿಗಳು ಚೆನ್ನಾಗಿ ಅಳವಟ್ಟು
ಜನಮಾನಸದೊಳು ಸಂವಿಧಾನ ಶಿಲ್ಪಿ ಎಂಬ ಬಿರುದಾವಳಿಗೆ ಪಾತ್ರರಾದ ಡಾ.ಅಂಬೇಡ್ಕರ್ ನಿತ್ಯ ಸತ್ಯ ಪ್ರಾತಃಸ್ಮರಣೀಯ ಪೂಜ್ಯನೀಯರು

ಇಂದು ನಮ್ಮ ಸಂವಿಧಾನ ಸಮರ್ಪಣಾ ದಿನ
ದೇಶದೆಲ್ಲೆಡೆ ಹಮ್ಮಿಕೊಂಡ ಅಭಿಮಾನದಿ ಚಿಂತಕರ ಚಾವಡಿ ಅರಿವಿನ ಅರಮನೆಯಲ್ಲಿ ಚಿಂತನ ಮಂಥನಗಳ
ಸಂಸ್ಮರಣದ ಪರಿಮಳ ಸೂಸುತ್ತ
ಕೋಟಿ ಕೋಟಿ ಹೃದಯಗಳಲ್ಲಿ “ಒಂದೇ ಭಾರತ ಒಂದೇ ಸಂವಿಧಾನ” ಎಂಬ ದಿವ್ಯ ಮಂತ್ರ ಪಠಣ  ಒಮ್ಮನದಿಂದ ಮೊಳಗುತ್ತಲೇ ಇರಲಿ ಐಕ್ಯತೆಯ ಗುಣಗಾನ

*ಕವಿ:ಡಾ. ಜಯವೀರ ಎ. ಕೆ.*
       *ಖೇಮಲಾಪುರ*